1. Yehoba ginaula mabwainana 'i'abihe masalaheya
He gain a 1
Cebe hegaina *oina Yehoba galewa ma bale'u
'ihemasalahediya, ma bale'uina tuwa 'a'ahena, ma
guguyoina.
Ma Yehoba Yaluyaluwana ni'u tabwana 'i'ale'alele
dadana.
Muliyetega Yehoba 'igwaeya ma 'asilala 'ilatuwa, ta
sabwelo ma nihuwana 'iwataha luwediya. Beno
sabwelo 'aigeda.
Sabwelo heluwena 'oina Yehoba 'igwaeya, ma
we'aha 'iwataha luwediya galewa ma bale'uwa.
Sabwelo hetoina 'oina Yehoba 'igwaeya ma we'aha
'itauya tupwa 'aigeda 'oina ma bale'u 'ilatuwa, ma
wete 'awata ma 'aiwe bale'uwa sibwala haneya.
Sabwelo hehatana 'oina Yehoba 'igwaeya sinenuga,
wai'ena ma 'wadima simasaleha.
Sabwelo nima 'aigeda 'oina Yehoba 'igwaeya
silahana ma bwasumo simasaleha.
Sabwelo sikisina 'oina Yehoba 'igwaeya hebahebai
simasaleha. Eema 'igwaeya, "Tomota tapaihowa, gide
tauda, ma 'ane silahana, bwasumo, hebahebai
siloinaedi." Coinega loheya ma wahine 'ipaihowediya
ma 'ihegwaediya sihenatuna dabalala ma bale'u
mabwaiyana siloinae.
Yehoba 'i'iteya 'ina paihowao mabwaiyadi 'adi 'ita
bwebwe'adi, ta weyahidi 'iyaliyaya. Ma sabwelo
hesebenina 'oina Yehoba 'i'aiyawasiya.
2. Yehoba tomota 'ipaihoweya
He gain a 2
Mwalo geya dohi, ma hesi we'aha 'ina 'ebelatu
bale'uwega ma bale'u 'i'abihegogai. Ma Yehoba
bale*u 'oinega loheya 'ipaihoweya, ma 'abusuna 'oina
yawasina 'imu^abaleya. Loheyaina sanina Adama.
Yehoba tanoha 'ipaihoweya tupwa Ideni 'oina, ma
'abehega loheyaina 'i'ita'itayahi, ma 'aiwe hagana
hagana 'ilagudiya tanoha, huwaidi bwebwe'adi. Caigeda
'aiweina tauna yawasi 'ana 'aiwe. Ma 'aiwe
heluwenaina tauna bwebwe'ana ma galana 'adi
'ebesanapu.
Yehoba loheyaina 'ihegwaeya ma tanohina
'i'itayahi, 'igwaeya, "Caiwe mabwaiyana huwaidi 'ino
'ebe'ai, ma hesi bwebwe'ana ma galana 'adi
'ebesanapu 'ana 'aiwe sahena 'u'ai'ai. Ceguma 'u'ai
nage 'aiwena, 'u'amasa.
Yehoba hebai ma bwasumo mabwaiyadi 'i'ewedima
loheyaina 'oina, ma sanidi 'ilagudiya, ma hesi
'oidiyega geya 'eta 'ana to'abihetena 'iloba. Goinega
loheyaina Yehoba 'ihe'enosineya, ma loheyaina
lusulusuna 'aigeda 'i'ewa yahuleya, beno 'oinega
wahine 'ipaihoweya, ma 'itoeyama Adama 'oina.
Siteluwaedi bubugewadimo, ma hesi geya sida hedeba
mwadimwadina.
3. Mumuga galana
He gain a 3
Ma mwata tauna sanasanapuina, wahineina
'ihegwaeya, "Ceguma 'aiweina huwaina 'u'ai nata geya
'u'ama'amasa, na hesi sanapu 'uloba gide Yehoba."
Ma wahineina 'i'iteya 'aiweina huwaina 'ana 'ita
'ausalana, ta 'i'eweya ta 'i'aiya, ma tupwana
'i'ebwaeya mwanenaina 'i'aiya, ta sisanapudiya
sibugewa, ma 'aiwe nabaina sisailidiya 'adi
lobodaboda. Beno lahilahiina 'oina sihesagoheya
Yehoba 'iyawayawala tanoha, ta si'edahwana.
Yehoba 'igwaeya, "Ta'eha 'omi?"
Ma loheyaina 'igwaeya, "Yahesagohegowa ta
yamatauta, ta ya'edahwana, weyahina yabugewa."
Yehoba 'igwaeya, "Taiya 'ihegwaegowa ta
'ubugewa? Nuwana 'aiweina 'eto'etobodana 'u'aiya."
Ma loheyaina 'igwaeya, ''Wahineina 'u'ebwaegauwa
tauna 'i'ebwaegauwa."
Yehoba wahineina 'ihesilaleya, 'igwaeya, "To'aha
bewa 'upaihoweya?"
Wahineina 'igwaeya, "Mwata 'i'abowegauwa, ta
'aiwe huwaina ya'aiya."
Coinega Yehoba mwata 'ihegwaeya, "Bewa tauna
weyahina gamwauwega nata 'u'awala bale'uwa. Bewa
yahegwaego 'owa natumwao ma tubumwao ma wahine
tubuna nata sihetalahuwala. Tauna mwagu 'i'ahubwale,
ma 'owa 'ahe'edu'eduna 'unali."
Ma Yehoba wahine 'oina 'igwaeya, "Cowa nata
muya madonna 'uloba 'ino tuta henatuna 'oina, ma
mwaneu 'uhenuweya ta tauna 'iloinego."
Yehoba loheya 'oina 'igwaeya, "Weyahina 'eda
bewa 'upaihoweya, 'oinega 'awata yahebwaladi
bale'uwa, beno 'oinega 'upaihowa madonna ma
'e'ahai 'uloba, beno tuwa 'ino paihowaina 'ana siga
'amasa. Bale'uwega yapaihowegowa ma 'abwa wete
'uhila bale'uwa."
Yehoba wete 'igwaeya, "Tuta bewa tomota gide
tauda, ma sisanapuya bwebwe'ana ma galana. Geya
sowana si'ai'ai yawasi 'ana 'aiwe huwainaina ma
simiya hataya." Coinega Yehoba 'ihesumane latuwediya
Idiniyega ma 'ane 'adi sibegula hali 'asai. Eeta
Yehoba anelose 'aigeda ma wete wepasi ninininimina
'ihesumanediya, tanoha Ideni si'ausiya, ma geya 'eta
sowasowahina 'itauya yawasi 'ana 'aiwe 'oina.
LOINA MIYAMIYANAINA
Old Testament stories and extracts
in the Bunama language
Compiled by David Lithgow, Samson Tauwaliyesa
and Antioki Iso.
SUMMER INSTITUTE OF LINGUISTICS
Ukarumpa, Papua New Guinea
PubHshed 1992
ISBN 9980 0833 4