Martu Wangka Genesis Translation

Julyjujanu 1

Mamamili wangka julyjujanu

Julyjuminyirri Mama ngarnawarrapurlukalu palyarnu
ngarnka, parnalurrju

Julyjujanu 1:1 — 2:3
Karrpu kuju nyinangu

Julyjujanu 1:1-5

Julyjuminyirri Mama ngarnawarrapurlukalu palyarnu
ngarnka, parnalurrju. Palunyangka parna nyinapayi
puurra, murltuminyirri, kalyuwiyaju ngarripayi. Mungalulu
juturnu kalyungka. Kurrurnpa kunyjunyu Mamamili parra
yankupayi wangalyuru, ngarnawarra kalyungka. Palunyangka
Mama ngarnawarrapurluka wangkangu. Wajarnu palulu,
"Rantala!" Kayila rantarnuka raayanu. Jampa Mamalu nyangu
rantanyja, pukurlarringura. Palunyajanupulanya lalapungu
rantanyjakamu munga. Palunyajanu Mamalu yinijunu
rantanyja "karrpu". Kayila yinijunu munga "mungajarra".
Yuu, rukarringu, kuju karrpu pakirringu. Yungunpakarnu.

Karrpu kujupangka ngarnka yutirringu

Julyjujanu 1:6-8

Kalyu ngarripayi parlparri, kalyuwapayi. Palunyajanu
Mamalu wajarnu, "Yutirriwa ngarnka! Kalyu lalapuwa!"
Jilanyangulyu Mamalu palyarnu ngarnka. Palunyajanupulanya

Julyjujanu 1

Julyjujanu 1

ngarnkalu lalapungu kalyu. Kalyu karlkinpa ngarringu
ngarnawarra munkarra. Karlkinpa kalyu ngarripayi
kaninyjarra. Palunyajanu Mamalu yinijunu kalyu ngarnawarra,
"ngarnka". Yuu, palunyajanu rukarringu, kujupa karrpu
pakirringu. Yungunpakarnu.

Karrpu kujupa parna yutirringu, warta pakara wanarnu

Julyjujanu 1:9-13

Palunyangkara Mamalu wajarnu kalyuku, "Wayila
kujukarti, kujungkarrirakun!" Kayilara wajarnu parnaku,
"Miralarri!" Palunyajanu yiltangulyu parna yutirringu.
Palunyajanu Mamalu yinijunu parna, "parna". Kayila yinijunu
kalyunga kujungkarrinyjanga, "kujungurru". Palunyajanu
Mamalu parra nyanguka pukurlarringu. Kayila wajarnu,
"Kunyjunyuminyirri." Palunyajanu Mamalu wajarnu, "Pakalaya
wartakaja parnajanu nyaa nyirrinyirri! Karlkinyurra pakalku
wartakaja wilykiwintikaja, yungkalpintiwintikaja. Karlkinyurra
pakalku wartakaja mirrkawintikaja."

Palunyangka yiltangulyu, parnajanuya wartakaja
pakara wanarnu, nyaa nyirrinyirri. Pakarnuya wartakaja
wilykiwintikaja, yungkalpintiwintikaja. Ngapiyuruya?,
paruyuru, yuwinyjiyuru. Jampa wilyki parujanu wartajanu
punkara kurrungu parnangka, wartayila paru pakarnu. Mirta
kujupa warta, paki, parungulyu. Jilanyaya yurlupirti nyinani
wartakaja, wilykiwintikaja. Yuu, witukaya pakarnu wartakaja
mirrkawintikaja. Ngapiyuruya?, wamurlayuru, jawirliyuru.
Ngaakajaluya mirrkakajalu kanyirni wilyki ngururrpa. Jampa
wilyki wamurlajanu mirrkajanu punkara kurrungu, parnangka.
Wartayila wamurla pakarnu. Mirta kujupa warta, paki,
wamurlangulyu. Jilanyaya yurlupirti nyinani wartakaja,
mirrkawintikaja, yuu.

Palunyajanu Mamalu parra nyanguka pukurlarringu.
Kayila wajarnu, // Kunyjunyuminyirri. /, Yuu, palunyajanu
rukarringu, kujupa karrpu pakirringu. Yungunpakarnu.

Karrpu kujupa jirntukamu wirlarra yutirringu

Julyjujanu 1:14-19

Palunyajanu Mamalu wajarnu, "Jirntu, yutirriwa
ngarnkangka! Wirlarra, yutirriwa ngarnkangka! Kurtalyakaja,
yutirriwaya ngarnkangka !" Kayilara wajarnu jirntuku,
"Nyinaran karrpupintiwiyaju. ,, Wajarnujanampa
wirlarrakukamu kurtalyakajaku, "Nyinaranyurra
mungajarrapintikajawiyaju. Nyinakunyurra ngarnkapintikaja
ngarnkangka wulungulyu. Jampanyurranyaya nyaku
martukajalu ngarnkapintikaja, kulilkuya karrpu, mungajarra,
wantajarra, yalijarra. Jilanyaya kulilku. Yuu, nyinakunyurra
ngarnkangka. Kanyurra parra pirrpalku parnakarti."
Palunyajanu yiltangulyu. Yutirriraya parra pirrparnu
parnakarti.

Yuu, Mamalupulanya ngapirnu jirntukamu wirlarra.
Kujarrangulyupula maju kujarra. Majujaranga palulu
ngapirnu junu, rantalkuraku, karrpungkawiyaju.
Kujupajaranga julijaranga palulu ngapirnu junu, rantalkuraku,
mungangkawiyaju. Kajananya Mamalu ngapirnu junu
kurtalyakaja, ngarnka wana, yuu. Mamalujananya yarnnga
junu ngarnkangka, parra pirrpalkurakuya parnakarti. Jirntunga
karrpupinti, parra pirrparni parnakarti karrpukurluwiyaju.
Wirlarrakamuya kurtalyakaja mungajarrapintikaja, parra
pirrparniya parnakarti mungangkawiyaju. Jampajananya
Mamalu nyangu, pukurlarringujanampa. Wajarnuyila,
"Kunyjunyuminyirriya." Yuu, palunyajanu rukarringu, kujupa
karrpu pakirringu. Yungunpakarnu.

Karrpu kujupa kuka kalyukarrayijakamu turru yutirringu

Julyjujanu 1:20-23

Palunyajanu Mamalu wajarnu, "Kalyukarrayijakaja,
yutirriwaya kalyungka! Yarnngakuyarraya yutirriwa!"
Kayila wajarnu, "Turrukaja, yutirriwaya! Kay a parra
parrpakala ngarnawarra!" Yuu, yiltangulyu. Mama
ngarnawarrapurlukalujananya ngapirnu kalyukarrayijakaja,

Julyjujanu 1

nyaa nyirrinyirri, majukamu juku. Mirtajananya kujunkujun
ngapirnu, paki, yarnngangulyujananya ngapirnu. Kajananya
ngapirnu turrukaja nyaa nyirrinyirri. Jampajananya Mama
ngarnawarrapurlukalu nyangu, pukurlarringujanampa.
Wajarnuyila, "Kunyjunyuminyirri."

Palunyangkajanampa Mama ngarnawarrapurlukalu
wajarnu, "Ngampurr kanyinmalparnanyurranya." Kajanampa
wajarnu kalyukarrayijakajaku, "Wululuya nyukapungama.
Japukajajananyanyurra kanyinmalpa. Kanyurra yarnngarriku
wanalku kalyungka. Yuu, nyinakunyurra kujungurrungka,
karruwanalurrju." Kajanampa Mama ngarnawarrapurlukalu
wajarnu turrukajaku, "Wululuya nyukapungama! Kanyurra
yarnngarriku wanalku/' Yuu, palunyajanu rukarringu, kujupa
karrpu pakirringu. Yungunpakarnu.

Julyjujanu 1

Karrpu kujupa kuka parnawanaya yutirringu, ka martu

ngapirnu

Julyjujanu 1:24-31

Palunyajanu Mamalu wajarnu, "Kukakaja, miralarriwaya!
Yarnngakuyarraya yutirriwa! Nyaa nyirrinyirrinyurra nyinaku
parnawana." Palunyangkaya yiltangulyu kukakaja yutirringu.
Mamalujananya ngapirnu kukakaja, purnujanukaja. Nyaa
nyirrinyirriya nyinapayi purnuwana. Kajananya ngapirnu
kukakaja, parrikijanukaja. Nyaa nyirrinyirriya nyinapayi
parrikiwana. Yuu, Mamalujananya ngapirnu kuwiyikaja nyaa
nyirrinyirri. Jampajananya Mamalu nyangu kukakaja yarnnga,
pukurlarringujanampa. Wajarnuyila/ / Kunyjunyuminyirri. ,,

Palunyajanu Mamalu wajarnu, "Karu,
ngapilkurarnajananya martukaja, ngayuyuruya nyinaku.
Kajanampaya nyinaku maaja ngaangka parnangka.
Maajajanampaya nyinaku kalyukarrayijaku. Kajanampaya
nyinaku maaja turrukajaku. Maajajanampaya nyinaku
kuwiyikajaku yarnngaku. Yuu, maajajanampaya nyinaku."
Jilanyangulyu wajarnu Mamalu. Palunyajanupulanya Mamalu
ngapirnu martu kujarra. Yuu, ngapirnupulanya yirnakamu
wanti. Mamalupulanya ngapirnu palunyayuru kujarra
walyjayuru kujarra. Yuu, Mamayurungulyupula martu kujarra
nyinapayi. Yirnakamupula wanti nyinapayi. Jampapulanya
ngapirnu yirnakamu wanti.

Mamalupulampa wajarnu, "Ngampurr
kanyinmalparnantapula wululu, yuu. Kanyilkujananyapulan
ngankalku ngulyikaja yarnnga. Kanyurra yarnngarriku
martukaja nyuntu kujarrakamu marlajanukaja nyuntu
kujarramilikaja. Parranyurra yanku nyinaku yinta
kujarra yintangka. Kanyurra nyinamalpa maaja
ngaangka parnangka. Nyinakujanampanyurra maaja
kalyukarrayijaku. Nyinakujanampanyurra maaja turrukajaku.
Nyinakujanampanyurra maaja kuwiyikajaku yarnngaku. Yuu,
maajajanampayurra nyinaku.

"Ngaanya kujupa wangka. Yungkunirnanyurranya

Julyjujanu 1-2

mirrka, ngalkuraku. Yuu, yungkunirnanyurranya
wartakaja wilykiwintikaja yungkalpintiwintikaja nyaa
nyirrinyirri. Ngapiyuruya?, paruyuru, yuwinyjiyuru.
Ngayulurnanyurranya yungkuni wartakaja mirrka wintikaj a.
Ngapiyuruya?, wamurlayuru, jawirliyuru. Mirrkanyurrampaya
nyinamalpa. Yungkunirnajanampa kukakaja mirrka
wituka. Yukurijanampa mirrka nyinamalpa yarnngaku
kukakajaku, turrukajakulurrju." Palunyangka yiltangulyu.
Palunyajanujananya Mamalu parra nyangu yarnnga
palyarnunyja, Mamanga pukurlarringu.
Mukumukur ringuj anampa . Waj ar nuyila,
"Kunyjunyuminyirringulyuya." Yuu, rukarringu, kujupa
karrpu pakirringu. Yungunpakarnu.

Warrkamujanu Mamanga yurlta nyinangu

Julyjujanu 2:1 -4

Yuu, Mamalu ngapirnu ngarnka, parnalurrju.
Mamalujananya ngapirnu yarnnga ngarnkangka nyinanyjanpa.
Palulujananya ngapirnu yarnnga parnangka nyinanyjanpa.
Ngapirnujananya junu. Nyaa nyirrinyirringulyuya
nyinapayi. Warrkamurripayi Mama ngarnawarrapurluka
karrpuparaku karrpungka. Warrkamu palunyamili
wiyamanu Mamalunga. Jampa yungunpakarnu, Mamanga
yurlta nyinangu. Mirta warrkamurringu jiingka karrpu
kujupangka, paki, yurlta nyinangu, warrkamujanu Mamanga
yurlta nyinangu. Ngapirnu Mamalu parnakamulurrju,
karrpuparaku karrpungkalu. Ngapira yurlta nyinangu. Jiijanu
Mamalu wajarnu wangka junu, "Ngaanya karrpu kujupa
kujupaminyirri."

Julyjujanu 2-3

Yaatamukatnupula Yiipi nyinapayi yintangka Yiitanja

Julyjujanu 2:25 — 3:24

Jilalulu wantingka muunpungu

Julyjujanu 2:25 — 3:6

Nyupararrapula nyinapayi. Nyinapayipula
nyimparraparni, mirtangkupula kurntarripayi, paki.
Mamalujananya palyarnu kuwiyikaja. Kujuyila palyarnu
yalyjirrpa, yalyjirrminyirri, jilangurninyjinga. Yanulu jila
wantikarti. Kara japirnu, "Kaji yilta? Kajinpulampa Mamalu
wajarnu?, 'Mirtanpula ngalkura mirrkakaja wartajanu.' "
Wantilura wajarnu jilaku, "Mamalulimpaju wajarnu,
'Ngalkuranpula mirrka karlkijanu wartajanu. Kuju warta yikini
ngaangka. Kutungkangulyu yikini. Mirtanpula ngalkura
mirrka jiijanu wartajanu, paki, junkuranpula/ Yuu, jampaliju
pampulku mirrka wartangka jiingka, miturrikuliju."

Jilalura wajarnu wantiku, "Ngala! Mirtan miturriku,
paki." Wajarnura jilalu, "Jampan ngalku, kuranarrikun.
Mamayururrikun, yuu. Mamalunpulampa mikulu wajarnu,
'Mirtanpula ngalkura'. Jampan ngalku jiinya mirrka,
nintipukarrikun. Nintirrikuran kunyjunyuku. Nintirrikuran
walykuku. Yuu, Mamayururrikun/' Palunyangka wanti yanu
wartakarti, nyangu mirrka wartangka. Mirrka wartangka
wiltiyikipayi. Jampa mirrka nyangu, wajarnu wantilu,
"Kunyjunyu ngaanya mirrka. Kunyjunyumpa ngalkupinti."
Palunyangka wurr ngangkulpayi, "Jamparna ngalku ngaanya
mirrka, nintipukarrikurna". Palunyangkajananya mirrkakaja
witarnuka kangu ngalangu. Kara kangu yungu kirtapartarnu.
Yungura. Ngalanguyila kirtalu.

Ngalangupula kurntarringu

Julyjujanu 3:7

Jampapula mirrka ngalangu, kuranarringupula.
Nyangukangkupula wajarnu, "Nyimparraparnili nyinani."

8

Julyjujanu 3

Kangkupula kurntarringu. Palunyangkayilapula manu
parrkakaja majukaja. Kapula nyimparrarnu parrkajanu.

Mamapulampa mirrangu

Julyjujanu 3:8-13

Palunyangkapula Mama ngangkulpayi jakarrpa.
Maaja maju ngarnawarrapurluka parra yankupayi
yukartu yaltayaltangka yintawana. Palunyangkalurapula
Mamangkamarra yanu kukurringu wartapuru. Mamara
mirrangu yirnangurninyjiku, "Wanyjawan?" Palunyangkara
yirnalu wajarnu Mamaku, "Kulirnurnanta jakarrpa,
karna ngurlurringu nyimparraparni. Kukurringuyilarna
wartapuru." Mamalura japirnu yirnaku, "Nganalungku
wajarnu?, 'Nyimparraparnin nyuntu, kurntarrikuran/ "
Mamalura japirnu, "Ngalangun mirrka wartajanu?
Nyaamparnanta wajarnu? Wajarnurnangku, 'Mirtan
ngalkura/ " Wajarnura Mamalu jilanya. Palunyangkara yirnalu
wajarnu Mamaku, "Nyuntulujun junu wanti ngayuku. Kami
palunyalungulyu mirrka manu yungu. Ngalanguyilarna."
Palunyangkara Mamalu japirnu wantiku, "Nyaapan ngapirnu?"
Palunyangkara wantilu wajarnu, "Jilalungulyurni muunpungu,
pakirni kajarnu. Ngalanguyilarna mirrka/'

Julyjujanu 3 9

Mamalupulanya warrkirnu

Julyjujanu 3:14-21

Palunyangkara Mamalu jilaku wajarnu, "Putamanun
nyuntulu. Karnanta watalku junku. Palunyajanun parra
wayinmal nyurungka parnawana. Parra wayinmalpan wulu
wirlangka. Wankalpin parnawana ngalya ngarrimalpa. Parnan
ngalkumalpa. Mirtarnajananya watalku junku pulukukaja,
paki. Mirtarnajananya watalku junku karlki kukakaja, paki,
nyuntungurninyjirnanta watalku junku."

Palunyangkara Mamalu wajarnu jilaku, "Wirla
rarrungkupula nyinamalpa nyuntukamu wanti ngaanya.
Mirtangkunpula nyuntu kujarrawiyaju nyinaku wirla
rarru, paki. Wulungkuya nyinaku wirla rarru jamukaja
nyuntumilikajakamu jamukaja wantimilikaja marlajanukaja.
Yuu, wirla rarrungkunyurra nyinamalpa wulu. Jampantaya
wantimililu marlajanukajalu nyaku, kantulkukantaya
karljarrpungku katanyuku. Jampajananyan nyaku nyuntulu
wantimili marlajanukaja, pajalkujananyan tartanyuku,
yuu." Jilanyara wajarnu Mamalu jilaku. Palunyangkara
Mamalu wajarnu wantiku, "Kanguran wangka jilaku
nyuntulu. Palunyajanurnangku wajarni, 'Jampan jiji kanyilku,
wilyjiwilyjirrimalpan. Nyuriran wangkamalpa nyupaku kirtaku
nyuntumiliku, mirtaran parlanyarriku, paki. Palunyangkangku
yirnanga nyupanga nyuntumilinga nyampali nyinamalpa/ "

Palunyangkalu wangkangu yirnajarangka Mama. Yininga
yirna Yaatamu. Wajarnura Yaatamuku, "Nyuntululun
kulirnu wantingka nyuntumilingka. Nyamparnangkupula
wajarnu, 'Junkuranpula mirrka wartajanu kujujanu, mirtanpula
ngalkura/ Nyurilunpula ngalangu. Yuu, nyuntulun
walykurnu, mirtajun wangka kangu, paki. Palunyajanu
parna walykurriku. Mirrkakuranpula ngurrilku parnawana
karrpu kujarra karrpungkalu, mirtanpula julyjuyurulu mirrka
manku, paki. Wankalpinpula manarrarrimalpa, jamparanpula
mirrka ngurrilku/' Yiltangulyu parna walykurriku. Pakalkuya
wartakaja walykukaja parnawana. Pakalkuya mangujikaja,
jilkarnkajalurrju. Ngurrilkuranpula mirrkaku mangujiwana

10

Julyjujanu 3

Julyjujanu 3-4

11

jilkarnwana. Yuu, parranpula ngurrilku manku mirrka
wupalmarta. Jamparanpula ngurrilku mirrkaku ngalkuraku,
palunyangkanpulanya warrkulypa pakalku ngalyawana.

Yuu, Mamalura wajarnu yirnajaraku, "Ngayulurnanta
palyarnu parnajanu. Jampan miturriku, marlakun parnarriku.
Parnangulyun nyuntu." Palunyangka kirtangurninyjilunga
yinijunu wanti, // Yiipi ,/ . Wangkajanampa martukajaku
nyarrartinkajaku. Wajarnila ngayurtinju, "wanka nyinani".
Wajalpayiya nyarrartinju, // yiipi ,/ . Yuu, nyamirringulampa
yiipinga yarnngaku marlajanuku. Nyamijanampa nyinangu
martukajaku marlkarrikajaku julyju. Nyurilampa nyinani
nyami ngayurtinku kuwarri. Palunyangkapulanya Mamalu
palyarnu yungu pulpupulpu wurna jirrji. Kangkupula junu.

Mamalupulanya kaatanjanu yiyarnu

Julyjujanu 3:22-24

Palunyangka Mama ngarnawarrapurlukalu wajarnu,
"Ngayuyururringu martu jiinya. Nintirringura kunyjunyuku.
Nintirringura walykuku. Kujupa warta mirrkawinti yikini
ngaangka yintangka. Jampa yirnalu ngalku ngaajanu
wartajanu, wulu nyinaku wanka, mirta miturriku. Yankura
witalyjaku martulu jiinya mirrka. Palunyajanurna marrkulku
kurtingku ngaajanu yintajanu, yuu." Jilanya wajarnu
Mamalu. Palunyangka wajarnu kurtingu yirna Mama
ngarnawarrapurlukalu. Kurtingu yinta kujupakarti. Wulu
yanu. Mamalu wajarnu kurtingu jiinya martu wartakajajanu
yintajanu Yiitanjanu. Yininga yinta Yiitanpa. Parnangkayila
jawara ngalkupayi mirrka martulu. Mamalu palyarnu
martu parnajanu. Kayilara martulu jawalpayi parnangka
mirrkaku, yuu. Mamalupulanya wajarnu kurtinguka ngurlurnu
nyupararra yintajanu.

Palunyangkajananya Mamalu kurtingu palumilikaja
wikarrukaja. Yanuya yintakarti Yiitankarti wikarrukaja,
marrkulkurakujananyaya martukaja. Kakarrarajananya junu
Mamalu yintawati wikarrukaja. Mulyawatijananya junu.
Kayila Mamalu junu waru tilirrinyja wartakajawati yintawati.

Warunga ngapiyuru?, nayipuyuru warlpukurruyuru.
Palypalyarripayi. Warunga kujupakartirripayi. Jampapula
marlakurrikijalu yintakarti nyupararra, purtupula kurrungku,
paki. Mamalujananya junu wikarrukaja yintangka,
warulurrju. Mirtapula yanku marlaku martu kujarra jii kujarra,
ngalkurakupula mirrka nyarrangka, paki. Pujupula ngalku
mirrka wartajanu kujujanu nyarrangka, wulupula nyinaku
wanka, mirtapula miturriku. Palunyajanupula mirta marlaku
yanku jii kujarra martu kujarra yintakarti Yiitankarti, paki.
Wirrirlikartipula maa yanu.

MAMAMILI WANGKA

Published by

THE BIBLE SOCIETY IN AUSTRALIA

Canberra